محمد منير

الأسم الحقيقي :-

محمد منير ابا زيد جبريل متولي

اللقب :-

الكينج – الملك

تاريخ الميلاد :-

1954

عنده حوالي 60 سنة

من مواليد محافظة أسوان , منير بيخلط بين المزيكا الريجي و الجاز مع السلم الخماسي النوبي , وطبعا طريقة غناه و كلام أغانيه الي مفيش منافس ليه في السوق لانو ببساطة مينفعش يتقلد لانو منـــير .

منير هاجر من أسوان بسبب غرق قري النوبة تحت بحيرة ناصر , منير خريج جامعة حلوان قسم السينما والتليفزيون من كلية الفنون التطبيقية , منير كان سبب في ان الناس تسمع مزيكا احمد منيب وخلاها تشوف النور , كان السبب في ده الشاعر عبد الرحيم منصور.

لو انت بتسمع منير و عارف منير مش حتستغرب لما تلاقيه واقف علي ستيدج بيغني و لابس ( شبشب ) و ممكن جدااا تلاقيه لابس ( نص كم )  في عز السقعة و ممكن برده يلبس ألوان عشوائية و لما تبص عليها اول مرة تحس انها مختارة بعشوائيةو ملخبطة كده , ومع شعره المفلفل الي مش مترتب , و طريقة غناه علي المسرح كل ده علي بعضو كده بيدي كاريزما غير طبيعية لمنير.

ببساطة منير بيعرف يخدك منك شوية و يوديك للعالم بتاعو هو , الي صعب حد يفهمو غير المنايرية بس .

*** منير مش بس مزيكا ... منير أسلوب حياة ***

كانت بداية احتراف منير للمزيكا لما انضم لفريق العمل الموسيقار هاني شنودة الي اضاف كتيررر جدا لمنير و لباقي فريق العمل بس في اول ألبوم تعاون فيه منير و هاني شنودة منجحش اوي , بس الشركة كانت مقتنعة جدا بمنير و هاني شنودة و فرقة المصريين وانهم حيعملو حاجة مع بعض انضم ليهم يحيي خليل و فرقته , طبعا نجح الألبوم و كسر الدنيا و توالت بعد كده النجاحات لحد دلوقتي وشمس منير بتنور في السما .

انجازات منير نذكر منها :-

* اول مطرب في العالم يخلط بين الموسيقه النوبي و الموسيقه الشرقي .

* المطرب الوحيد الي بيغني اغاني قديمة في الحفلات و الغريب تفاعل الجمهور معاه مهما كانت الأغنية قديمة لان جمهور منير حافظ كل أغانيه .

* اول مطرب استخدم Electric Guitar في أغانيه .

* اول مطرب عربي يقدم موسيقي الريجي .

* منير المطرب المصري و العربي الوحيد الي قدم اغاني من تراث اكتر من دولة عربية .

* اول مطرب في العالم يغير توزيعات و صولوهات اغانيه لما بتتقدم Live يعني اغاني منير في الحفلات بتبقي حاجة تانية خااااااالص غير الي الناس بتسمعها و المنايرة عرفين كده كويس